سلام سلام

[right]
[color=#000066]الاشخاص:
المذيع:مقدم البرنامج التليفزيونى
سليم:رئيس الوفد المفاوض
سلومة:المتحدث الرسمى باسم الوفد
عبد السلام:نائب رئيس الوفد [/color]


المذيع (بمرح) سيداتى انساتى سادتى....اهلا ومرحبا بكم فى هذه الجولة الجديدة من مفاوضات السلام المتعثرة للتعرف على اهم ما
يدور فى هذا المؤتمر العالمى([color=#990000]يعدل رباط عنقه وجاكيت البدلة ثم يتحدث بلهجه حاده[/color])
ايها السادة فى الوقت الذى دخلت فيه عملية السلام مرحلة صعبة وحساسة دعا السيد سليم سلامون العائد الى الساحة السياسية حديثا بعد العلاج
باحد المصحات للامراض العقلية والعصبية دعا الى نبذ الخلاف الدائر بين الاطراف المتصارعة فى الشرق الاوسط والعودة الى طريق السلام الذى نستهله بهذا المؤتمر
هذا وعندما وصل الوفد الى هنا فى بلدة سلامونيا لم يكن احدا بانتظاره فى المطار ولكن ذلك لن يؤثر على عملية السلام ولا عملية اللوز
([color=#990033]ثم يتكلم بصوت عالى وبنبره حاده[/color])
وها انا ارى الوفد المشارك فى المفاوضات وهو يتجه الى حديقه الحيوان بسلامونيا مقر المفاوضات
([color=#990000]فى هذه اللحظة يكون الوفد قد دخل ويتوجه اليهم المذيع[/color])
استاذ سليم استاذ سليم......ممكن دقيقتين لو سمحت
سليم:يا ابنى اذا كان المؤتمر كله دقيقتين فلما انت تاخدهم حيفضل لينا ليه!!!!!
المذيع:دا مش ليا يا فندم دا علشان الشعب
سليم:علشان الشعب! .خلاص يا ابنى كلنا فدا الشعب
المذيع:نحب اولا نتعرف على اعضاء الوفد
سليم:سليم سلامون..رئيس الوفد
عبد السلام:عبد السلام سلامات.نائب رئيس الوفد
سلومة(اخرس ويتحدث كالخرس تماما)
المذيع:هوا بيقول ايه يا استاذ سليم
سليم:بيقول اسمه سلومة
المذيع:ودا مع الوفد يا فندم
سليم:طبعا يا ابنى دا اهم واحد
المذيع:ليه هوه بيشتغل ايه بالضبط
سليم:ده!!! متعرفوش!!!!
المذيع:لا والله!!
سليم:ده المتحدث الرسمى باسم الوفد
المذيع:عظيم جدا يا فندم والله اول مره اعرفه
سليم:واديك عرفته وبعدين ده بلوه مسيحة ..اكتر واحد بيعفى الوفد من الاحراج
المذيع:ازاى
سليم:ده ييجى يقول البيان الختامى بيتكلم وكل واحد يفهم البيان بمزاجه ......فهمت؟
المذيع:اه طبعا.طبعا... لكن احب ابدا سؤالى للاستاذ عبد السلام واقول له
الجماهير العربيه تبحث عن السلام فى كل مكان ولكنها لاتجده فماذا تقول لهم؟؟
عبد السلام:انا احب اطمئن الشعوب العربية ان السلام سيكون متوفر قريبا جدا ...
احنا ناويين نجيب سلام كتيييير ونحطه فى زجاجات ونعطى لكل واحد زجاجه مع الزيت والسكر
فى التموين عشان خاطر الشعب يشبع سلام
المذيع:استاذ سليم..ماهى اهم خططك فى هذا المؤتمر؟؟؟؟
سليم:احنا المره دى داخلين فى خطة ذكية جدا جدا..ناوين نديهم الارض وناخد السلام ..
الارض كتيره لكن السلام مش موجود
وبكده نقدر ننفذ وعد الاستاذ عبد السلام ونوفر السلام فى زجاجات ويتوزع مع التموين
المذيع:انا احب فى البداية اعرف جدول اعمال المؤتمر؟
سليم: ([color=#990000]يبحث فى جيوبه ثم يخرج ورقة[/color])
ادى يا سيدى جدول الاعمال
المذيعبعد النظر فى الورقة)
ده جدول الضرب يا فندم
[color=#990000]سليم يبحث مره اخرى ثم يعطيه ورقه[/color])
يبقى اكيد هوه ده
المذيع:لا برده مش هوه
سليم: يا سيدى ... ماتدقش على كل احنا ناويين نتفاوض على كل الارض العربية علشان منزعلش حد
المذيع:ما هى اهم العقبات اللتى تعترض الاتفاق الفلسطينى الاسرائيلى
سليم: الانتفاااصة...ونحن نرفصهااااااا
المذيع: قصد حضرتك الانتفاضة
طيب حضرتك بتوعد باسه الشعوب العربية؟؟؟
سليم: انا احب اطمئن كل الشعوب العربية اننا نبذل كافة المساعى الدبلوماسية لحل القضية بالشكل اللائق وانا لا اكن اى جهد. يعنى انا مثلا قافل الدكان وقاعد الف ورا المفاوضات.يقولوا يمين اقول يمين
يقولو شمال اقول شمال
المذيع: دكان!!!!! ([color=#000099]باستغراب[/color]) هو حضرتك بتشتغل ايه بالضبط؟؟؟؟
سليم:عجلاتى
المذيع ([color=#000099]باستغراب[/color])عجلاتى!!! وايه اللى دخل العجل فى مفاوضات السلام
سليم:انت مش بتقرا جرايد ولا ايه؟!!! وبتشوف المنشت العريض الذى يقول
لابد من الاسراع بدفع عجلة السلام. ازاى بقى يسيبوا العجلة من غير عجلاتى
وانا عامل حسابى فى كل حاجه
جايب معايا فى الشنطة كوتش السلام ومنفاخ السلام وكولحة السلام يمكن العجلة
تنام فى السكة ولا حاجة اقوم انزل وانفخ
المذيع:سؤال هام يتردد على السنة المسلمين جميعا وارجوا من الاستاذ عبد السلام
الاجابة عليه.....وهو متى نصلى فى المسجد الاقصى؟؟؟؟
عبد السلام: يادى السؤال اللى ملوش لازمة احنا كام مليون؟
المذيع:مليار نسمة
عبد السلام:ازاى مليار هيصلوا مع بعض فى جامع واحد احنا دايما كده يا مسلمين
نحب نزاحم فى بعض ...الاحسن كل واحد يصلى فى بيته
المذيع:استاذ سلومه بعد زيارتك للعراق ما هى الاوضاع هناك؟؟؟
([color=#990000]يقوم سليم بترجمة السؤال لسلومه بلغه الخرس ويقوم بالتحاور معه لمده طويلة نسبيا[/color])
المذيع:هوه بيقول ايه يا فندم؟؟
سليم:بيقول الوضع مطمئن
المذيع:كل ده والوضع مطمئن؟؟؟؟
سليم: لا معلش اصله بيحب يزودها شوية
المذيع:نترك حاليا الوفد ونتمنى له النجاح فى داخل الغرف المغلقة
( [color=#990000]يبدا الوفد فى الانصراف[/color])

المذيع: وحتى الانتهاء من المؤتمر نعيش هذه اللحظات فى التعرف على الشخصيات المشاركة فيه...
الاستاذ سليم نشا منذ الصغر محبا للسلام لدرجة انه طلع فى وشه حب السلام..
له العديد من الشهادات مثل شهاده استثمار بجنيه- وشهاده تطعيم ضد الجدرى وشهاده دولية من منظمة الله يكسفكم
ودى اخت اليونسكو.
الاستاذ عبد السلام اديب وفنان ومفكر يكتب دائما عن السلام ومتغيراته المستمرة له العديد من المؤلفات اللتى غيرت مجرى العملية السلمية منها
(سليمولى عليه,يا سلام سلم,. سليمولى على اللى غايب
والكتاب الذى غير مجرى تاريخ العملية السلمية كتاب سلامتها ام حسن)
الاستاذ سلومة نشا طوال عمره متشردا بين البلدان حافى القدمين ولد من اب متخلف وام معتوهه
وماتت والدته بعد ولادته بالحصبة يتحدث 4 لغات ويعمل كمرشد سياحى لاكبر الشركات الامريكية

([color=#990000]يصيح المذيع فجاة[/color])
وها انا ارى الوفد المشارك وهو خارج من المؤتمر
([color=#990000]يظهر الوفد بصوره كاريكاتيرية وكانهم فى جنازه وهم يبكون[/color])
المذيع: استاذ سليم هى دى دموع الفرح؟
سليم: لا دى دموع البصل
المذيع: نحب نعرف نتائج المؤتمر من حضرتك
سليم: دى نتائج عظيمة..نتائج مدهشة.... خش خودلك نتيجه
المذيع: نتيجة ايه يا فندم؟؟
سليم: نتيجة السنه الجديدة
المذيع:انا عاوز نتائج المؤتمر
سليم: اولا يتم خروج اليهود من فلسطين
المذيع:الله اكبر......الله اكبر
سليم: وذلك بعد 200 سنه من الان
وان لم تخرج يتم القيام بعمل عسكرى تقوم به امريكا
المذيع:ضد اليهود؟
سليم:لا.ضد العراق
المذيع:طيب ليه يا فندم؟
سليم: هوه كده .....اضرب العراق يخاف اليهود
سليم:ثانيا...يتم استعاده جميع المقدسات الاسلامية فى فلسطين
المذيع:الله اكبر.الله اكبر
سليم: اولا المسجد النبوى..ثانيا ضريح السيد البدوى...ثالثا ويتم استعاده المرسى ابو العباس ورفاته
المذيع: لا.دى فعلا نتائج عظيمة...
بحب اخيرا نسال الاستاذ سلومه عن الوضع فى السودان
([color=#990000]يتم ترجمه السؤال بواسطه سليم ويتحدث معه لفتره قصيره جدا[/color])
سليم:هوه بيقول ان الوضع فى السودان بعد الحصار الاخير وبعد الضربه الامريكية متدهور للغاية ويجب وقفه العرب والمسلمين جميعا لازاله اثار الضربه الامريكية على السودان وذلك بجمع تعويضات مناسبة من كل
الدول العربية لمساعده اطفال السودان الجوعى
المذيع:كل ده
سليم: مش قلت لك دا داهية مسيحة ومحدش يعرف قيمته غيرنا
المذيع:احنا بنشكركم على الوقت الثمين اللى قضيناه معاكم لكى يعرف رجل الشارع العربى كل ما يدور فى المؤتمر الخاص بعملية السلام......

[color=#000066]اشكركم سيداتى وسادتى ومع العوده لجولة اخرى فى وقت اخر.
والسلام عليكم ورحمة الله وبركاته[/color] [/right]